Galleri Systog Dale ønskjer velkomen til separatutstilling med Frank Brunner. Utstillinga syner heilt nye malerier og etsninger, men og arbeider frå tidlegare periodar i kunstnarskapet. Utstillinga opnar laurdag 1. juli kl. 12. Kunstnarer er tilstades under opninga. Resten av utstillingsperioden har galleriet ope onsdag-sundag kl. 11.-17.

Kunsten må vere generøs 

Kyst, olje på lerret, 170x130 cm

Frank Brunner sine bilete vert sett pris på av eit stort publikum. For kunstnaren handlar det om å skape opplevingar som rører ved grunnleggande kjensler. - Eg leitar kontinuerleg etter motiv som er kjensleladd. Det er det eg elskar. Eg spør meg sjølv: Kva får du ut av dette? Kan det glede nokon? Eller gjere at dei ser seg sjølv eller verda på eit anna vis? Eg likar ikkje kunst som er gjerrig. Kunsten må vere generøs, forklarar han. 

Frå Høvåg til New York
Det var på Høvåg i Lillesand det heile byrja. Då han var i tenåra vart han introdusert til kunsten av ein ven som teikna og måla. Brunner fatta raskt interesse, og gjennom ungdomen vart kunsten stadig viktigare for han. Dei planlagde økonomistudiane vart bytta ut med ei omfattande skolering i klassisk figurativt måleri. Han starta ved Statens Kunstakademi i Oslo i 1993, og hadde eit gjesteopphald ved Ilja Repin Statsakademi i St. Petersburg før han avslutta studiane ved akademiet 1998. Så gjekk reisa til Yale University i New Haven, USA. 

 Brunner busette seg i Brooklyn, og gjennom det pulserande kunstlivet i New York vart han godt kjend med samtidskunsten sine mangfaldige uttrykk. Dei tretten åra han budde og arbeida i metropolen har utvilsamt vore avgjerande for hans kunstnariske utvikling. I kunsten kombinerer han det nøysamt planlagde frå det klassisk figurative, med det spontane og frigjorte som pregar samtidskunsten. Resultat er eit særeiget og umiskjenneleg uttrykk som både kritikarar og publikum har trykt til hjarta. 

Kritikarrost og utselt
I 2000 entra Frank Brunner den norske kunstscenen, med den segnomsuste separatutstillinga på Stenersenmuseet i Oslo. Utstillinga synte ein ung, men likevel mogen kunstnar. Teknisk var han briljant, men bileta vitna om noko meir enn handverksmessig perfeksjonisme. Dei hadde ein lyrisk og poetisk tonalitet. Utstilling vart kritikarrost og utselt, og Noreg hadde fått ei ny kunststjerne. 

Sidan har det gått slag i slag med utstillingar, salssuksessar og kritikarros, både nasjonalt og internasjonalt. I Noreg har han med anna hatt utstillingar i Henie Onstad Kunstsenter og Haugar Vestfold Kunstmuseum, samt ei rekke utstillingar i det velrenommerte Galleri Haaken i Oslo. Internasjonalt har han hatt fleire utstillingar i New York, Paris, Berlin og Luxembourg. 

Augneblinkskjensler 
- Eg er fascinert av skjeringspunktet mellom motsetnadar. Mellom det berekna og det impulsive. Det urbane og det rurale. Mellom kultur og natur, forklarar han. Fascinasjon for motsetnaden syner seg tydeleg i hans evne til å veksle mellom det nære og det flyktige, mellom det figurative og det abstrakte. Oppbygginga av bileta gjer at dei talar til betraktaren på fleire plan.

Frank Brunner er kjend for si evne til å fryse augneblinken, gjerne med motiv framstilt i eit drøymeaktig landskap. Ved hjelp av stemningsbærande lys, refleksjonar og skuggar, inviterer Brunner betraktaren inn i eit rom der eigne tankar og minner kan få spele seg ut. Det er noko kjenneleg ved bileta. Som om dei synar noko ein har opplevd, men ikkje kom i hug før ein fekk sjå det att.

Frank Brunner
Født 1971, Høvåg

Bor og arbeider i Oslo og Kristiansand

UTSTILLINGSKATALOG